Pjesë të qyteteve ukrainase Rubizhne dhe Severdonetsk janë shkatërruar në masë të madhe, e këtë e dëshmojnë edhe imazhet e reja satelitore të kompanisë amerikane Maxar Technologies.
Bombardimet e granatimet e vazhdueshme mes forcave ukrainase dhe atyre ruse – kanë bërë që pjesë të këtyre dy qyteteve të shkatërrohen plotësisht. E ajo çfarë i shkatërroi më së shumti ishte pikërisht artileria ruse.
E pavarësisht se lagje të tëra janë bërë rrafsh me tokë, kjo nuk po i mjafton ushtrisë së Vladimir Putinit, që po vazhdon të bombardon në dy qytetet e rajonit të Donbasit.
Imazhet satelitore tregojnë se dhjetëra ndërtesa në veri të Severodonetskut, janë shkatërruar nga sulmet ushtarake.
Ndërkaq zonat e gjelbëruara janë bërë me gropa nga predhat e shumta që kanë rënë.
Madje dy spitale janë shkatërruar plotësisht – duke krijuar kratere (mbi 40 metra të gjera), si pasojë e bombave gjigante ruse që kanë rënë mbi to.
